Papa Fransoa : izay manetry tena ihany no afaka manaraka an’i Jesoa nitsangan-ko velona !

Faly miarahaba antsika amin’izao fetin’ny Paka izao ! Hiaraka handresy amin’i Kristy hatrany anie isika !

Indro ifampizaràna amintsika ny hafatry ny Papa Fransoa, Urbi et Orbi.

“Ry rahalahy sy anabavy, nitsangan-ko velona i Kristy !

Nandresy ny fankahalana ny fitiavana, nandavo ny fahafatesana ny fahavelomana ary nanala ny haizina ny hazavana !

Namela ny voninahitra maha-Andriamanitra azy i Jesoa Kristy noho ny fitiavany antsika ; nesoriny ny maha izy azy, noraisiny ny endriky ny mpanompo ary afa-baraka izy rehefa namoy ny ainy teo amin’ny hazofijaliana. Noho ireo, nasandratr’Andriamanitra izy ary nataony Tompon’izao tontolo izao. Tompo i Jesoa !

Manoro ny lalan’ny fahavelomana sy ny fahasambarana i Jesoa tamin’ny nahafatesany sy ny nitsanganany ho velona : ny fanentren-tena io lalana io ary misy fahafaham-baraka. Io no lalana mitondra amin’ny voninahitra. Izay manetry tena ihany no afaka miroso amin’ny “zavatra any ambony”, any amin’Andriamanitra (Kol 3, 1-4). Mijery midina ny be hambo, miandrandra fijery kosa ny manetry tena.

Ny marainan’ny Paka, nihazakazaka nankany any amin’ny fasana i Piera sy Joany rehefa nilazan’ireo vehivavy ka nahita fasana nivoha sy foana. Nanatona izy ireo ary “niondrika” mba hiditra tao. Hahafahana mahazo ny misitery dia mila “miondrika” ary manetry tena. Izay manetry tena ihany no afaka mahazo ny voninahitr’i Kristy ary manaraka ny lalany.

Manentana antsika handresy hatrany, hifaninana ary hampanjaka ny maha izy antsika izao tontolo izao ankehitriny. Saingy noho ny fahasoavan’i Jesoa Kristy maty sy nitsangan-ko velona dia tsimoka vaovao ho an’ny Olombelona ny kristianina amin’ny fikatsahana ny fanompoana ny hafa, tsy hieboebo fa vonon-kanampy ary feno fanajana.

Hery izany fa tsy halemena. Tsy mampiasa herisetra izay mitondra ny herin’Andriamanitra sy ny fitiavany ary ny rariny ao aminy. Miteny ary miasa miaraka herin’ny fahamarinana, ny hatsarana ary ny fitiavana izy.

Mitalahoà amin’ilay Tompo nitsangan-ko velona mba tsy ho resin’ny hambo, loharanon’ny herisetra sy ny ady fa hanana herim-po hampanjaka ny famelana sy ny fandriampahalemana isika. Mangatahà amin’i Jesoa mpandresy mba hanalefahany ny fijalian’ireo rahalahintsika enjehina noho ny anarany sy ireo mizaka tsy fidiny ny vokatry ny ady sy ny herisetra ankehitriny…”

Tsidiho ny News.va raha te handalina kokoa ianao.