Fangatahana ampanaovin’ny Papa Ray Masina – mey 2022
Mba hahita ao amin’i Masina Maria ny fahaiza-mihaino, ny halalin’ny fahaiza-mandanjalanja, ny herim-pinoana ary ny fahafoizan-tena hanampy ny hafa anie ny tanora izay voaantso ho amin’ny hafenoan’ny fiainana
Mandritra ity volana mey 2022 ity ny Papa Fransoa dia manentana ny mpino rehetra mba hivavaka manokana ho an’ny tanora. « Raha hiresaka momba ny fianakaviana aho, dia tiako hatomboka amin’ny tanora aloha izany », hoy ny Papa, teo am-panombohana ny fampianarany. Nampahatsiahiviny tamin’izany fa môdely ho an’ny tanora i Masina Maria renin’i Jesoa, amin’ny « herim-pony sy ny fahaizany mihaino ary ny fanoloran-tenany ao anatin’ny fanompoana ». Ny volana Mey rahateo dia volana natokana hanajana an’ilay Virjiny Masina hatrizay. Entanin’ny Papa manokana àry ny tanora mba hanao an’i Masina Maria ho môdely fakantahaka.
Hoy indrindra ny Papa Fransoa raha nandefa hafatra ho an’ireo « tanora rehetra te-hanorina zava-baovao, tontolo tsaratsara kokoa » eo amiin’ny fiainany : « Araho ny ohatra nasehony, mandraisa fahasahiana ». Masina Maria dia nomen’Andriamanitra ho môdely, fankatahaka amin’ny fihainoana, ny fahaiza-manavaka sy mandanjalanja, amin’ny herim-po sy fanompoana. Tanora, nisokatra tamin’ny fiainana i Masina Maria. Nandre hatrany anatin’ny fony ny Anjely Gabriely niantso Azy izy. Sanganehana izy ka nametra-panontaniana, nefa nahazo toky ka vonona nandray andraikitra. Tena feno fahasahiana !
Fa ankoatra ny ohatr’i Masina Maria amin’ny fahaiza-mihaino, ny Papa Fransoa dia manoro lalana ny tanora amin’ny dingana atao amin’ny fahaizana manavaka sy mandanjalanja mba « hihaino ny tenin’ny raibe sy reniben’izy ireo » ihany koa, satria « any no hahitan’izy ireo fahendrena izay hitarika azy ireo hihoatra ny olana misy ankehitriny ». Fa tokony henoina ihany koa izy ireny. « Mila mamorona sehatra maro kokoa hahafahan’ny tanora miantso sy maneho hevitra isika » hoy ny Papa Fransoa ao amin’ny Fanentanana apostolika « Velona i Kristy ». Tsy maintsy mamantatra sy mahita izay andrasan’i Jesoa ao aminy ny tanora, ary tsy izay heveriny fa ho vitany tsy akory. Amin’ity dingana ity indrindra no maha sarobidy ny fanohanan’ny raibe sy renibe, hoy hatrany ny Papa Fransoa.
Hafatra ampitaina sy asongadin’izao fangatahana izao ihany koa ny lohahevitra momba ny fanompoana, mba hisy fiantraikany tsara amin’ny hafa io fahaizana mandanjalanja sy manavaka io. Manasa ny tanora ny Papa Fransoa mba ho be herim-po sy ho tapaka-kevitra ny hilaza hoe « Eny » amin’ny Tompo, tahaka ny nataon’i Maria.
Eo amin’ny tontolon’ny sinaodin’ny Eglizy isika ankehitriny, dia tian’ny Papa Fransoa ny hanasongadina ny maha zava-dehibe ny fanofanana ny tanora amin’ny fahaizana mandanjalanja sy manavaka. Ahoana no ahafahantsika manampy ny tanora, araka ny fomban’i Masina Maria, hihaino, handanjalanja, hamantatra ny antson’ny Tompo ary hanompo eto amin’izao tontolo izao ankehitriny ? Eo tokoa no idiran’ny andraikitry ny zokiolona, izay afaka manampy azy ireo amin’izany asa izany.
Koa andeha àry isika hivavaka ho an’ireo tanora rehetra voantso ho amin’ny hafenoan’ny fiainana, eo ambany fijerin’i Masina Maria.
Narisoa SJ