Vavaky ny taonan’ny famindram-po
Ry Jesoa Kristy Tompo,
ianao no nampianatra anay ho mpamindra fo tahaka ny Ray any an-danitra,
ary nilaza taminay fa izay mahita Anao dia mahita ny Ray,
asehoy anay ny endrikao dia ho voavonjy izahay.
Ny topimasonao feno fitiavana nanafaka an’i Zake sy Matio tamin’ny fanandevozan’ny vola,
sy ilay vehivavy ratsy fitondran-tena ary i Madelenina tamin’ny fikatsaham-pahasambarana mifototra amin’ny zavaboahary fotsiny ihany ;
nampitomanianao i Piera taorian’ny nandavany Anao,
ary nampanantenainao ny paradisa ilay jiolahy nivalo.
Mba ataovy renay tsirairay avy toy ny miantefa aminay ny teny nolazainao ilay vehivavy Samaritanina hoe « Raha mba fantatrao mantsy ny fanomezan’Andriamanitra! »
Ianao no endrika hita maso maneho ny Ray tsy hita maso,
ilay Andriamanitra maneho ny heriny amin’ny famelan-keloka sy ny famindrampo,
mba ho endrikao hita maso eo anivon’izao tontolo izao anie ny Fiangonana, Ianao ilay Tompony tafatsangan-ko velona amim-boninahitra.
Fa sitrakao hisalotra fahalemena ihany koa ireo mpanomponao
hahatsapany fangorahana marina an’ireo izay ao anatin’ny tsy fahalalana sy ny hevi-diso :
ataovy mahatsapa fa efa nandrasan’Andriamanitra, tiany, ary navelany heloka ireo rehetra manatona ny iray amin’ireo mpanomponao.
Iraho ny Fanahinao ary hamasino amin’ny fanosorana avy aminy izahay rehetra
mba ho taom-pahasoavan’Andriamanitra izao Taon-Jaobilin’ny Famindrampo izao
ka hafanam-po vaovao no entin’ny Fiangonana milaza ny vaovao tsara amin’ny mahantra,
ny fahafahana amin’ny voafonja sy ireo iharan’ny tsindry hazolena
ary manambara amin’ny jamba fa hahiratra indray izy ireo.
Amin’ny alalan’i Maria, Renin’ny Famindrampo no angatahanay izany
aminao izay velona sy manjaka miaraka amin’ny Ray sy ny Fanahy Masina, amin’ny taona rehetra mandrakizay. Amen