Vavaka ho an’ny faha 10 taonan’ny CNECAUM
Ry Andriamanitra mahefa ny zavatra rehetra sy mandrakizay ô, Sitrakao ny miantso ireo tanora maro hivondrona ato anatin’ny CNECAUM na FET Oniversitera, mba hanara-dia an’i Jesoa Kristy, sy handalina ny finoana ary ny fiainana kristianina.
Misaotra Anao izahay eto am-pahatsiarovana ny faha-10 taona nijoroan’izany sampan-pikambanana izany, fa nampiely ny fahasoavanao eran’ny Nosy ny fisiany amin’ireo oniversite samihafa.
Ankininay aminao ny fanirian’ireo tanora marobe ankehitriny sy amin’ny ho avy, mba ho maro amin’izy ireo no hamaly ny antsonao, hahay hisafidy Anao ho loharano mahavelona sy fahazavan’ny fiainana, hiditra amin’ny fikambananay, na amin’ireo fikambanana hafa nankatoavin’ny fiangonanao.
Ampio koa izahay mba hanana ny saina amam-pon’i Jesoa Kristy, hahafahanay miaina ilay teny filamatra hoe « MIHA-JESOA isan’andro », ho zary olom-banona ho an’ny fiarahamonina sy ho olo-marina ho an’ny firenena ary ho masim-piainana eo anivon’ny Fiangonana, hijoro ho vavolombelon’ny Fitiavanao ao anaty fitiava-namana.
Ry Maria Reny malalanay ô, tantano izahay mba hahatanteraka eo amin’ny fiainanay manontolo ilay teny hoe : « Mandehana amin’ny fitiavana tahaka an’i Kristy ».
Amin’ny alalan’i Jesoa Kristy Tompo sady Zokinay no angatahanay izany. Amen
Masina Maria Renin’ny FET ô, Mivavaha ho anay.