Soridalana ho an’ny taona 2021
Toy ny fanao isan-taona amin’ny fiandohan’ny taom-pikatrohana sahala amin’izao dia manolotra mandrakariva ny SORIDALANA iombonana ho an’ny AFAFI-FET manerana ny Nosy ny Foibe Nasiônaly. Raha tsiahivina, tamin’ny datin’ny 17 Aogositra 2020, dia efa nisy ny « Soridalana manokana » nalefa sy nampitaina tany amin’ny isan-diosezy tany. Izany dia nampitaina tamin’ny alalan’ny adiresy mailaka sy ny Radio Don Bosco ary ny pejy facebook. Io « Soridalana manokana » io no nenti-niaina sy nampiharina hatramin’ny faran’ny taona 2020, raha mbola tao anatin’ny hamehana ara-pahasalamana isika. Ho an’izao taona 2021 izao kosa dia indro atolotra sy ampitaina amintsika eto ny SORIDALANA vaovao hiainana mandritra ny taona 2021.
« Ao Aminao ny loharanoko rehetra » (Salamo 87, 7)
Andininy 1 : Teny Faneva na Lohahevitra ho an’ny taona 2021
- Tsara ny ahalalantsika fa io Teny Faneva io no lohahevitry ny Kôngresy Eokaristika Iraisam-pirenena hatao any Budapest Hongrie, amin’ity taona 2021 ity, izay tokony ho natao tamin’iny taon-dasa iny. Mazava avy hatrany angamba fa ny Eokaristia no ambara sy asehon’io Teny Faneva io ; fa ny Eokaristia no Loharanon’ny fiainana kristianina. Ny Fikambanantsika rahateo fikambanana miorina sy mifototra amin’ny Eokaristia ary Fikambanana nipoitra avy tao anivon’ny Eglizy Reny ka miara-mitempo sy miaina aminy lalandava.
Andininy 2 : Tenin’Andriamanitra
- Ny Evanjely efatra (Matio, Marka, Lioka, Joany) ; fa samy maneho sy mitory momba ny Eokaristia izy ireo. Indrindra, hohalalinina sy hofantarina manokana izay Toko sy Andininy ahitana taratra ny Eokaristia.
- Ny Salamo 87 : izay ahitantsika ny Lohahevitry ny Kôngresy Eokaristika Iraisam-pirenena faha 52 no sady teny Fanevantsika ihany koa.
Andininy 3 : Tahirin-kevitry ny Kôngresy Eokaristika Iraisam-pirenena
Misy ny tahirin-kevitra lehibe sady mafonja, iombonana maneran-tany, maneho ny fampianaran’ny Fiangonana sy manentana ny kristianina handalim-pinoana miainga avy amin’io Lohahevitra io. « Ao Aminao ny loharanoko rehetra », Ny Eokaristia : loharanon’ny fiainana sy ny asa fanirahana kristianina. Efa voadika amin’ny fiteny Malagasy izy io ka anentanana antsika ny fandalinana azy. Jereo fa ampitaina mipaingotra miaraka amin’ity Taratasim-pifandraisana ity io tahirin-kevitra Fampianarana io. Iangaviana indrindra isika aomônie, amin’ny fampianarana sy ny fanabeazana ataontsika mba hiezaka ny hampiditra izany ao amin’ny fiainam-pikambanana.
Andininy 4 : Fampielezana ny Tambajotram-pivavahan’ny Papa Maneran-tany na ny TPPM
Anisan’ny singa mandrafitra tsy tapaka ny Soridalana isan-taona ny fiainana sy fampielezana ny TPPM. Ny antony dia noho izy io IRAKA manokana miantefa amin’ny AFAFI-FET avy amin’ny Papa Ray Masina. Tsy mahagaga izany, nefa kosa tena zava-dehibe loatra, satria ny TPPM sy ny AFAFI-FET miaraka aminy dia natokan’ny Papa ho « Asa aman-draharahan’ny Papa manokana » (Œuvre Pontificale).
Entanina ny isan-diosezy sy isaky ny Ekipa fototra ary ny mpikambana tsirairay mihitsy, hanao ezaka amin’ny fomba mahomby ho entina mampahafantatra sy mampiely izany amin’ny kristianina. Aoka tsy hionona fotsiny amin’ny famarotana na fizarana ny taratasy kely TPPM misy ny fangatahan’ny Papa isam-bolana isika.
Andininy 5 : Fampiasana ny Rakipiainana MIHA-JESOA
Toy ny fampielezana sy ny fiainana ny TPPM dia anisan’ny singa lehibe mandrafitra ny Soridalana ihany koa ny fampiasana ny Rakipiainana MIHA-JESOA. Io mantsy no ahafahan’ny tsirairay manombana sy mijery ny ezaka vitany amin’ny fandrosoana ara-panahy. Tsy ny ankizy madinika ihany anefa no natao hampiasa sy hampihatra ny MIHA-JESOA, fa ny mpikambana rehetra mihitsy.
Andininy 6 : Miantefa amin’ny isan-tsampana
Ho an’ny Zandrin’i Kristy sy ny Irak’i Kristy : Efa vita hatry ny ela ny BOKY IRAKA natokana ho azy ireo. Entano sy amporisiho ny ray aman-drenin’izy ireo mba hananan’ny ankizy io Boky kanto loatra io. Fa ny Mpanabe koa anefa dia tokony hanana. Azo hafarana sy vidina aty amin’ny Foibe Nasiônaly ary amin’ireo fivarotam-boky Katolika sasantsasany. Ampiasao mandritra ny fivoriana io Boky IRAKA io fa hohitanao ny vokatsoa aterany.
Ho an’ny Vavolombelon’i Kristy sy ny Ekipa Kristianina Ankehitriny : Efa vita dika amin’ny fiteny Malagasy ankehitriny ilay boky lafatra loatra natokana ho an’ny Zatovo sy ny Tanora. Tsy inona tsy akory io Boky io fa ilay Fanentanana apôstôlika nataon’ny Papa François, mitondra ny lohateny hoe : VELONA I KRISTY (Christus vivit). Entanina, ary amporisihina ny VK sy ny EKA mba hanana io Boky io avokoa. Torolalana sy fampianarana ho an’ny Tanora amin’izao vaninandro ankehitriny izao no votoatin’io Fanentanana apôstôlika io, ary mamaly ireo fanontaniana marobe ao an-tsain’izy ireo. Hovakina sy hifampizarana any amin’ny fivorian’ny Tarika any izy io ka samia miezaka.
Ho an’ny AFAFI : Anisan’ny fototra mampiorina sy mampijoro ny AFAFI ny fandalinana sy fanabeazana ny Finoana amin’ny alalan’ny Fampianaran’ny Fiangonana. Tsapa sy hita anefa fa mbola tsy dia mahazatra antsika loatra ny mamaky sy mifampizara ireny Fampianaran’ny Fiangonana ireny. Aza hadinoina fa ao anatin’ny endri-piainana maha AFAFI ny AFAFI, amin’ny maha Sampan’ny TPPM azy, ny fiaraha-mitempo amin’ny Fiangonana, ka tafiditra ao anatin’izany ny fahalalana sy fandalinana ny foto-pampianarany amin’ny endriny maro, toy ny Konsily, ny Taratasy Ansiklika, ny Fanentanana apôstôlika sy ny maro hafa koa.
Iray amin’ireny Fampianaran’ny Fiangonana ireny ny Fanentanana apôstôlika nosoratan’ny Papa François mitondra ny lohateny hoe : « NY HAFALIANA VOKATRY NY NY FITIAVANA (Amoris Laetitia)», nivoaka tamin’ny 19 Marsa 2016. Manampy indrindra ny Fianakaviana sy ny Tokantrano kristianina io Fampianaran’ny Papa io amin’ny fivelomana sy fiainana ny Fitiavana ao anatin’ny Fianakaviana.
Ho an’ny AFAFI àry dia hohalalinina manokana izy io mandritra ity taona 2021 ity, hanamarihana ihany koa ny faha 10 taona (11 Taona) niorenan’ny AFAFI teto Madagasikara ; hanaovana fifampizarana sy ho enti-miaina any anivon’ny fianakaviana sy ny fiaraha-monina any. Aoka mba samy hiezaka ny tsirairay hanana io boky io fa hahasoa ny fikambanana sy ny fiainam-pianakaviana ny fandalinana azy.
Andininy 7 : Andro maneran-tanin’ny TPPM/AFAFI-FET sy ny Olomasina Mpiaro
Homarihina sy hankalazaina amin’ny fomba manokana hatrany, toy ny fanao isan-taona, ny Andro maneran-tany ho an’ny TPPM/AFAFI-FET, dia ny Alahadin’ny Sakramenta Masina izany na ny Vatana aman-dRan’i Kristy. Toraka izany koa ny fetin’ny Olomasina Mpiaro : Mb Terezin’i Jesoa Zazakely sy Md François Xavier. Izany akory tsy mahasakana antsika tsy hankalaza ny Alakamisy Masina, izay efa nahazatra antsika hatramin’ny ela.
Andininy 8 : Soridalana maharitra vokatry ny Taon-jôbily faha 100 taonan’ny FET
Eo am-pandravonana ny Soridalana vokatry ny fankalazana ny jôbily faha 100 taonan’ny FET izahay ato amin’ny Foibe Nasionaly ankehitriny. Io Soridalana io dia avy amin’ny diosezy folo nandray anjara tamin’ny famolavolana izany. Rehefa voarindra sy voarafitra kosa izany dia hatolotra ireo Eveka Raiamandreny Filohan’ny CEPAL (Vaomieran’ny Eveka misahana ny pastoralin’ny lahika) mba hankatoaviny. Io no ho SORIDALANA MAHARITRA hitondra antsika mankany amin’ny faha 25 taona, 50 taona ary 100 taona manaraka indray.
Fa ho anisan’ny singa iray mandrafitra ny Soridalana isan-taona ihany koa anefa izy io na dia lazaina aza hoe : SORIDALANA MAHARITRA. Hampitaina amintsika avy hatrany io SORIDALANA MAHARITRA io raha vantany vao mahazo ny fankatoavan’ny Eveka.
Ireo àry no SORIDALANA ho entintsika mamakivaky indray ity Taom-pikatrohana 2020-2021 ity. Misy Andininy valo (8) izy io ka tsy misy hataontsika latsa-danja ny fampiharana azy.