Soridalana ho an’ny taom-panabeazana 2022 – 2023
Indro àry atolotra antsika ny soridalana hoentintsika hamakivaky indray ity taom-pikatrohana vaovao 2022-2023 ity. Manomboka amin’ny taona ho avy dia isaky ny 1 Oktobra no hanombohantsika AFAFI-FET miaraka ny taom-pikatrohana ka hanao ezaka manokana ny Foibe Nasionaly mba hivoahan’ny soridalana mialohan’izany.
Marihina fa hizara roa (2) mazava tsara ny soridalana :
1- Ireo soridalana hoenti-miatrika ny taom-pikatrohana vaovao
2- Vaovao sy tsara ho fantatra
FIZARANA I : Soridalana taom-panabeazana 2022-2023
Andininy 1 : Mitondra ny olona mankany amin’Andriamanitra amin’ny alalan’ny Fampiasam-panahy sy ny fahaiza-mandanjalanja (discernement).
1- Teny faneva
« Niainga i Maria ka nandeha haingana » (Lk 1, 39)
- Hiara-dalana amin’i Masina Maria sy ireo tanora manerantany isika amin’ity taona ity mba ho tena Eglizy miara-dia anjakan’ny fiombonana sy ny fandraisana anjara ny sehatra hikatrohantsika AFAFI-FET, eo anivon’ny mpiara-belona misy antsika, ka ny teny faneva manentana ny JMJ iraisam-pirenena hatao any Lisbonne Portugal ny 1-6 Aogositra 2023 no noraisina hiainantsika AFAFI-FET amin’ity taom-pikatrohana ity.
Hanampy antsika handalina izany àry dia halalinina manokana ny hafatry ny Papa ho an’ny tanora JMJ Lisbonne. - Ho an’ireo Zandrin’i Kristy sy ny Irak’i Kristy ary ny Vavolombelon’i Kristy izay mbola tafiditra anaty sokajin-taonan’ny ankizy dia hiampy ny fandalinana ny teny fanevan’ny Fihaonambe Nasionalin’ny Ankizy Katolika 2023 izany, « Rankizy ! Andao hiara-dia hitory ny Vaovao Mahafaly ho Fanantenan’ny Eglizy »
2- Tenin’Andriamanitra (Soratra Masina)
- Toy ny mahazatra dia miezaka hatrany ny AFAFI-FET miaina ny aim-panahy iveloman’ny Fikambanana. Manampy antsika hifanerasera bebe kokoa amin’Andriamanitra ny Tenin’Andriamanitra
- Ny Evanjelin’i Md Matio àry no halalinina manokana amin’ity taom-pikatrohana ity. Ireo hetsika rehetra hatao na fifaninanana Sarivelona, hira sns dia hiompana amin’izay.
- Ny Evanjelin’i Md Lioka ao amin’ny Toko voalohany ahitana ny teny faneva dia trandrahana.
- Halalinintsika bebe kokoa ny anjara toeran’i Masina Maria ao amin’ny fiainantsika, ao anivon’ny fikambanana sy ny Eglizy.
3- Ny Lalan’ny Fo
- « Ny Lalan’ny Fo », dia zotra am-panahy atolotry ny TPPM, izay aim-panahy mamelona ny Eglizy manontolo na ny vita Batemy rehetra tsy ankanavaka (Aina sy Famonjena tak. 15), notakarina avy ao amin’ny Fampiasam-panahin’i Md Ignasy. Koa tohizina hatrany ny fandalinana izany ho an’ny AFAFI-FET noho isika miaina ny Aim-panahy Ignasianina.
- Amporisihana ihany koa mba hiompana amin’ny « Lalan’ny fo » ny fihatahana masina na ny laretirety hataon’ny AFAFI-FET
- Fampiharana ny Miha-Jesoa na ny fanaovana Fandinihana ny kônsiansy
- Fampiharana ny vavaka (maraina – atoandro – hariva ) atolotra ao amin’ny Click to Pray – Madagasikara (Ho an’ireo manao FB)
4- Fampielezana ny TPPM
- Anisan’ny singa mandrafitra tsy tapaka ny Soridalana isan-taona ny fiainana sy fampielezana ny TPPM. Ny antony dia noho izy io IRAKA manokana miantefa amin’ny AFAFI-FET avy amin’ny Papa Ray Masina. Tsy mahagaga izany, nefa kosa tena zava-dehibe loatra, satria ny TPPM sy ny AFAFI-FET miaraka aminy dia natokan’ny Papa ho « Asan’ny Papa manokana » (Œuvre Pontificale). Tafiditra ao anatin’izany ireo fitaovan’ny TPPM : Vavaka fanolorana ny andro, Horonantsarin’ny Papa (Vidéo du Pape), Click to Pray izay avoaka ao amin’ny Pejy Facebook foibe Nasionaly ( AFAFI FET Madagasikara – AP MEJ Madagascar ary Click to Pray – Madagasikara ho an’ny vavaka Click to Pray amin’ny teny Malagasy). Amporisihana isika mba hanaraka izany tsy tapaka.
- Entanina ny isan-diosezy sy isaky ny Ekipa fototra ary ny mpikambana tsirairay mihitsy, hanao ezaka amin’ny fomba mahomby ho entina mampahafantatra sy mampiely izany amin’ny kristianina. Tsy hoe mampiely fotsiny fa manazava ny kendren’ny TPPM amin’ny olon-drehetra.
- Ny mpikambana rehetra dia tsy maintsy manana ilay vavaka fanolorona ny andro avokoa.
- Entanina manokana ny Aomônie isan-diosezy hanao fanentanana any amin’ny Radio Katolika.
5- Fitaovana ampiasaina
Fanamby lehibe hamelombelomana ny aim-panahy ny fananana fitaovana. Koa samy hiezaka hanana izany eo am-pelatanany ny mpikambana tsirairay hahafahana mandalina tsara ny fiainam-pikambanana.
- ZK sy IK : Boky iraka
- VK sy EKA : Velona i Kristy (Christus Vivit) Fanentanana Apôstôlika nataon’ny Papa Fransoa ho an’ny tanora.
- AFAFI sy mpanabe FET: Boky Aina sy Famonjena
Ireto tahirin-kevitra ireto ihany koa dia anentanana mba hohalalinina manokana : - Fandravonana ny dingana fakan-kevitra irosoana amin’ny Sinaodin’ny Eveka 2021-2023
- Hafatr’i Papa Fransoa ho an’ny andro maneran-tany ho an’ny tanora 2022-2023
Andininy 2: Miara-dalana amin’ireo mahantra sy ireo voahiliky ny fiaraha-monina ary ireo voahosihosy ny hasina maha-olona azy ;amin’ny alalan’ny iraka fampiroboroboana ny iraka fampihavanana sy fampijoroana ny rariny
1- Asa misionera
Isaky ny 1 Oktobra sy 3 Desambra isika dia mankalaza ny fetin’i Mb Terezin’i Jesoa Zazakely sy Md Fransoa Xavie, Olomasina mpiaro ny AFAFI-FET manerantany, sady mpiaro ny Misiona.
Marihina fa feno 150 taona amin’ity taona 2023 ity ny faha-150 taona nahaterahan’i Terezy kely, koa amporisihana isika hanamarika izany fa indrindra hanao ezaka amin’ny asa misionera eo anivon’ny fiaraha-monina misy antsika. Omena sehatra manokana ireo ankizy sahirana sy iharan’ny herisetra, ireo mahantra, ary ireo zokiolona tsy misy mpahatsiaro.
2- Fiarovana ireo ankizy amin’ny herisetra
Ny mpanabe no ray aman-dreny faharoa ho an’ny ankizy beazina. Koa entanina mba ho modely isika amin’ny fanabeazana ireo mpikambana fa tsy sanatria ka isika indray no hanosi-bohotanana azy ireo na sanatria koa hanao herisetra amin’izy ireo. Aoka mba hiainantsika mandrakariva ireo Didy folon’ny mpanabe.
- Manao vavaka samirery isan’andro
- Mahalala ny toetran’ny ankizy tsirairay
- Mahalala ny toetran’ny ray aman-dreny
- Mpitantana am-panahy ka manara-maso ny fandrosoan’ny tsirairay
- Iainana aloha izay ampitaina
- Mivavaka ho an’ny ankizy beazina
- Manomana tsara ny fivoriana
- Mijery sy mampivelatra ny toetra soa eo amin’ny ankizy sy ny tanora
- Mahay mihaino an’izay rehetra lazainy
- Manabe azy ho olona afaka sy vanona
Andininy 3 : Miara-dalana amin’ny tanora amin’ny fanorenana hoavy mitondra fanantenana
1- Fihaonambe iraisam-pirenena ho an’ny tanora (JMJ Lisbonne Portugal 1-6 Aogositra 2023)
Hiara-hientana amin’ireo tanora manerantany isika mandritra io fankalazana lehibe
io. Tsy ho hadinoina ihany koa ny andro iraisam-pirenena natokan’ny Papa Ray Masina ho an’ny tanora isaky ny Alahady Fetin’i Kristy Mpanjaka.
2- Fifanohanan’ny AFAFI sy ny FET
Amporisihana ny AFAFI (sampana ho an’ny olon-dehibe) mba hifanohana mandrakariva amin’ny FET (sampana tanora) amin’ny sehatra rehetra, ary samy haneho fa iray tsy mivaky ny fikambanana AFAFI-FET
3- Fandraisana anjara mavitrika amin’ireo vovonana
Isika AFAFI-FET dia mpikambana feno any amin’ny vovonan’ny ankizy, tanora, olon-dehibe. Koa amporisihana mihitsy isika mba hanana solontena any anatin’ny biraon’ny vovonana isan-diosezy, fa indrindra handray anjara mavitrika amin’ireo hetsika karakarainy.
4- Fihaonambe Nasionalin’ny Ankizy andiany fahatelo (JNE 3) 2023 hatao eto Antananarivo
Hotanterahina eto Antananarivo ny 26 hatramin’ny 30 Jolay 2023 ny JNE 3 koa amporisihina ny ZK, IK, VK handray anjara mavitrika amin’izany.
Andininy 4 : Miara-miasa amin’ny hafa amin’ny fitandrovana ny « Tranobe iombonana »
1- Fiarovana ny tontolo iainana
Hotohizina hatrany ny ezaka rehetra efa natao, ary hohatsaraina bebe kokoa aza izany, amin’ny fiarovana sy fikolokoloana ny Tranobe iombonana sy ho fitiavan-tanindrazana. Aoka mba hisy asa mivaingana azo tsapain-tanana ataon’ny isan-diosezy na ny Ekipa fototra momba izany. Amin’izany dia hisy fotoam-pivoriana hiresahana sy hifampizarana ary hampianarana manokana momba ny fitiavan-tanindrazana.
2- Fanohizana ny fampidirana ny Fanabeazana miaina sy mitia na ny EVA (Education à la vie et à l’amour) ato amin’ny AFAFI-FET.
Amporisihana manokana ireo mpanabe namonjy ny fiofanana nasionaly mba hanao ezaka amin’ny fandalinana izay norantovina ka hitady izay fomba mahomby hanamorana ny fampitana azy amin’ny mpikambana
Ireo àry no SORIDALANA ho entintsika mamakivaky indray ity Taom-pikatrohana 2022-2023 ity. Narafitra miainga amin’ireo safidy apôstôlika iombonana ho an’ny fikambanana rehetra miaina ny aim-panahy Ignasiana izy ity.
FIZARANA II : Vaovaom-pikambanana sy ireo tsara ho fantatra samihafa
1) Kongresy Eokaristika Nasionaly
- Ny taona 2020 isika no saika hankalaza ny faha-100 taonan’ny FET tany Antsiranana saingy tsy tontosa izany noho ny zava-nisy iaraha-nahalala. Ankehitriny àry dia efa entanina sahady isika rehetra hiomana fa ny 21- 25 Aogositra 2024 no hanamarihana indray ny faha-105 taonan’ny FET sy ny faha-15 taonan’ny AFAFI any Antsiranana ka Kongresy Eokaristika no hataontsika, sady hifanindran-dalana amin’ny Kongresy Eokaristika Iraisam-pirenena hatao any Quito (Equateur) ny 8-15 Septambra 2024. Mbola holazaina amintsika ny andinindiny momba azy io fa aza manjeny andro lava fa izao dia atomboka ny fiomanana satria lavitra ny lalana.
- Ho fanomanana izany àry dia efa ampiomanina sahady ny tompon’andraikitra isan-diosezy fa hisy ny Filankevitra nasionaly hatao eto Antananarivo ny 28-29-30 Avrily-1 Mai 2023. Solontena roa isan-diosezy no antsoina hanatrika izany, fa mbola ho hitantsika any amin’ny taratasim-pifandraisana manaraka ny andinindininy rehetra.
2) Fiofanana nasiônaly
Notanterahina tao amin’ny Masera Missionnaires de l’Evangile, Vinaninkarena Antsirabe , ny 19 hatramin’ny 23 Aprily 2022 ny fiofanana nasionaly ho an’ireo Aomonie sy tompon’andraikitry ny AFAFI – FET manerana ny Nosy. 62 ireo tonga tamin’izany, Aomonie 10, Zoky am-panahy 4, ary Lahika 48. Ny diosezin’i Taolagnaro sy Mananjary no tsy nahatonga solontena. Fiofanana momba ny fiainam-pikambanana hoentina manabe ireo ankizy sy tanora any amin’ny Diosezy tsirairay no natao.
Tsapa fa samy vonona hampandroso ny fikambanana ny tsirairay ary hita fa nihamafy ny fifandraisana teo amin’ireo tompon’andraikitra, indrindra fa eo amin’ny arsidiosezy.
3) Fandalovan’ny lehiben’ny Fikambanan’i Jesoa teto Madagasikara P.Arturo Sosa sj:
Nanao fitsidihana teto Madagasikara ny lehiben’ny fikambanan’i Jesoa P.Arturo Sosa sj ny 4 hatramin’ny 13 Oktobra 2022. Nandray anjara mavitrika tamin’izany ny AFAFI-FET tany amin’ireo toerana rehetra nanaovany fitsidihana. Koa isaorana isika rehetra naneho fiombonana sy fahavitrihana. Hafatra mafonja nampitainy tamintsika dia ny hoe : « ny fanompoana no fahatsarana tonga lafatra »
4) Fanafarana Ekipa nasionaly
Ny Foibe Nasionaly dia manao fitsidihana araka ny fangatahana avy aminareo, ary efa nisy ny toromarika momba izany tamin’ny filankevitra nasionaly. Amporisihana mihitsy ireo Diosezy efa ela tsy notsidihan’ny Foibe Nasionaly mba hanao ezaka.
Ny Ekipa nasiônaly dia mivory isam-bolana koa raha misy vaovao na zavatra maika tianareo hampitaina dia tsara raha kendrena amin’izany, ary angatahinay ihany koa mba tsy hifanindry amin’izany ny fotoana tianareo hanafarana ny Ekipa.
Fivoriana : isaky ny Sabotsy na Alahady faha-3 amin’ny volana
Laretirety Ekipa Nasionaly : 11-20 Aogositra 2023
5) Tatitra sy rakitra miakatra
Amporisihana hatrany isika mba tsy hanadino ny fanaovana ny tatitra isan-taona miaraka amin’ireo statistika. Efa maro no niezaka nanao izany fa hotohizantsika hatrany izany.
Raha misy ny fiovan’ny Birao na Aomônie dia tsara raha mampahafantatra izany aty amin’ny Foibe Nasionaly avy hatrany isika na dia mbola tsy vita aza ny tatitra, mba hisian’ny fitohizan’ny asa.
Toraka izany koa ny rakitra miakatra fanao isan-taona. Mbola maro ireo tsy nahatonga izany, koa entanina mba tsy hanadino ny adidy miandry antsika.