« Makà tahaka ahy » : indro ny valin’ny lalao !

Arahabaina isika AFAFI-FET tsy ankanavaka manerana ny Nosy nahatontosa soamantsara ny famaranana ny fankalazana ny taon-jobily faha 100 taona niorenan’ny FET teto Madagasikara iny. Iaraha-mahita sy mahatsapa fa samy niezaka ny isan-diosezy nanamarika izany tamin’ny fomba samihafa, fa ny niombonana dia ny Sorona Masina nankalazana an’i Kristy Mpanjaka namaranana ny Taon-jobily.

Tontosa soamantsara ihany koa ny lalao fifaninanana « Makà tahaka ahy », fitoviana amin’i Mb Terezin’i Jesoa Zazakely. Nisy dingana in-telo miantoana izy iny. 23 no isan’ny mpandray anjara tany am-piandohana. 12 tamin’izy ireo no tafakatra teo amin’ny dingana faharoa, ary 5 kosa no tafakatra niatrika ny dingana fahatelo sady famaranana.

Ankehitriny dia atolotra antsika ireo telo voalohany tamin’iny famaranana ny lalao « Makà tahaka ahy » iny.

Samy mendrika daholo ireo 23 mirahavavy nandray anjara, nefa kosa amin’ny maha lalao fifaninanana azy dia tsy maintsy misy ihany ny filaharana araka ny fitsarana nandraisan’ny maro anjara sy ny tato amin’ny Foibe nasionaly. Samy hahazo maripankasitrahana avokoa izay rehetra nandray anjara.

Eto am-pamaranana àry dia tsara ny mampiomana sahady ireo tovolahy sy tanora lehilahy ao amin’ny AFAFI-FET, fa ho avy tsy ho ela indray ny anjaranareo, « Makà tahaka ahy » fitoviana amin’i Md François Xavier. Mbola hatolotra eto ny fitsipika sy ny fepetra momba izany, ka aoka hiomana dieny izao izay rehetra mikasa handray anjara.

Ho ela velona ao am-pontsika anie i Jesoa !

Mandrakizay

Ny Aomônie Nasionaly, P Odon sj