Fototry ny fahombiazan’ny fifandraisana
Afafi !
Antsika rehetra ity tranonkala ity ka raha misy ny fifampizaràna tianao atao dia asa misalasala.
Anio dia Aurélien RANDRIANANDRASANA, mpanabe tanora no manolotra antsika taridalana hahafahana manatsara bebe kokoa ny fifandraisana.
———–
Maro ny fomba hahafahana manatsara ny fifandraisanao amin’ny hafa. Isan’ireny ny fahavononana hizara hafaliana sy ny fananana fomba fijery miabo (positif).
- Fanomanana ny zavatra TSARA ho lazaina.
Ezahina ny mampiditra ireo zavatra rehetra mety hampitsiky na hiteraka hafaliana ho an’ny olona resahina. Rehefa tsy manao fanomanana isika dia matetika tora-po no betsaka. Raha te hanova toetran’olona na hampita hafatra dia aleo lavitra teny mamy 1 minitra monja toy izay “sermonina” 15 minitra be izao.
Amin’ny alalan’ny fanomanana ny zavatra “TSARA” holazaina no mitondra fiovana sy fankaherezana ny olona hifandraisana, hanovany moramora ny fomba fijeriny mba ho any amin’ny tsara kokoa.
Fadiana ny mitanisa ny hadisoan’ny hafa, ny mandrangaranga sazy, ny mampihoroho, ny manala baraka, ny manao teny mandratra…eo imason’olon-kafa ankoatra ny olona tiana hiresahana.
Resahina manokana izy satria ny hanova azy no tanjona fa tsy ny hanaovanao tora-po akory sanatria.
Amporisihina isika hilaza ireo zavatra TSARA, mitondra hafaliana, eny anivon’ireo seham-piainana misy antsika : ao antokantrano, any an-tsekoly, any am-piangonana, eny anivon’ny fikambanana…
- Fomba fijery miabo
Mba ao an’eritreritrao ve ny hizata tsiky sy hafaliana ho an’ny hafa ? Tsy mivaly totohondry ny tsiky fa mitarika ny olona hanatona sy hiresaka bebe kokoa. Ny olona falifaly lalandava dia miaiky fa tsy misy ny tonga lafatra eto an-tany fa azo atao kosa ny manatsara hatrany hatrany ny manodidina.
Fomba firesaka azontsika ampiasaina amin’ny fiainana andavanandro araka izany ny hoe:
- Iza moa no tsy ho solafaka eto an-tany fa ny zava-dehibe dia ny fahaizana maka lesona sy miatrika ny ho avy ;
- Fomban-javatra eto an-tany izany fa tsy natao hahakivy ;
- Tsy irery ianao fa eto aho afaka ny hiara-mivavaka ;
- Misaotra anao amin’ny fahatokisana ahy ;
- Mankasitraka amin’ny fahatongavana ara-potoana anio, ny ezaka ataontsika amin’ny manaraka dia ny ….
- Mety mbola tsy ananantsika izao ny vahaolana fa izy Fanahy Masina anie hanazava ny saintsika miandalana eny …
- Manana fotoana malalaka tsara aho afaka mihaino anao
Azonao dinihina ihany koa ireo : Sakafom-pitondran-tena isan’andro