Fanolorana ny andro Jona 2017 : tsy hianatra ady intsony ny olona
Amin’ity volana Jona ity dia mbola afantoky ny Papa Ray Masina hivavaka hatrany isika ho an’ny fanambin’ny zanak’olombelona amin’izao vanin’andro izao, dia ny mba hisian’ny « Fiadanana sy ny Fandriampahalemana » eran-tany. Amin’izany dia tsindriany sy marihiny manokana ny hitondrana am-bavaka ny fampitsaharana ny fivarotana fiataovam-piadiana izay fototry ny herisetra sy ny ady mbamin’ny tsy fandriampahalemana rehetra.
Tsy takona afenina tokoa mantsy ankehitriny ny fihazakazahan’ireo firenen-dehibe amin’ny fanamboarana sy famarotana fitaovam-piadiana mahery vaika. Misy amin’ireny firenena ireny aza no manao ho fampandrosoana ny toe-karem-pireneny amin’ny alalan’ny famarotana fitaovam-piadiana. Etsy andanin’izany anefa dia mazàna ny firenena madinika sy mahantra no mividy sy mpanjifa ireny fitaovam-piadiana ireny. Na dia misy aza ny lalàna mifehy ny fanondranana sy ny famarotana azy ireny dia mihanaka izaitsizy ny famarotana izany antsokosoko.
Toa tsy voafehin’ny olombelona intsony ny voka-dratsy aterak’izany, na eo amin’ny fifandraisana eran-tany na eo amin’ny samy mpiray firenena sy mpiara-monina. Amin’ny firenena madinika, toa an’i Madagasikara, dia mitombo ny asa fampihorohoroana sy ny asan-jiolahy etsy sy eroa satria ny fitaovam-piadiana mahery vaika no itokian’izy ireny. Ny fandrangarangana fitaovam-piadiana mantsy no mitarika ireo karazan-kerisetra sy korontana maro miseho ankehitriny. Mazàna anefa dia ny vahoaka madinika sy tsy manan-tsiny hatrany no lasibatra sy matimaty fahatany manoloana izany.
Ny Fiangonana, amin’ny alalan’ny Papa Ray Masina, dia tsy mitsahatra ny mampianatra ny zanany sy mitondra hafatra ho an’izao tontolo izao ho fampanjakana ny rariny sy ny hitsiny, ka hisian’ny fiadanana sy ny fandriampahalemana eo anivon’ny fiarahamonina sy ny firenena ary izao tontolo izao. « Ny fampanjakana ny fiadanana, hoy ny Papa Fransoa, dia manomboka avy ao anivon’ny fianakaviana… Anisan’ny fanamby maika tsy maintsy atrehina amin’izao vanin’andro izao ny fanorenana tontolo tony sy milamina » ; laha-tenin’ny Papa Fransoa izany teo anatrehan’ireo Masoivohon’ireo firenena fito tonga nitsidika azy tamin’ny 15 Mey 2014. Nantitrateriny tamin’izany ny hampitsaharana ny fivarotana fitaovam-piadina izay fositra manimba ny fandriampahalemana maneran-tany. Ny rehetra, hoy izy, dia samy miteny Fiadanana sy Fandriampahalemana avokoa, nefa ny fampielezana sy fampiasana fitaovam-piadiana dia tena mifanohitra tanteraka amin’izany. Mananosarotra ary mampanalavitra ny fitadiavana vahaolana ho amin’ny fandriampahalemana ny fisian’ny fitaovam-piadiana mihahaka sy miparitaka etsy sy eroa.
Ombieny ombieny ny Papa no mitaona sy miantso ny olona ho amin’ny fandriampahalemana, indrindra ireo filoham-pirenena na filoham-panjakana izay tompon’andraikitra voalohany amin’ny filaminan’ny vahoaka ao aminy. Fandriampahalemana, tsy amin’ny teny fa amin’ny asa sy vokatra mivaingana: ho an’ireo nilaozana na voailika ary miatrika ny hanoanana noho ny fampihorohoroana; ho an’ny mpitsoa-ponenana sy ireo voaroaka amin’ny taniny; ho an’ireo mijaly noho ireo olom-bitsy manao ny vola ho andriamanitra izay mitondra amin’ny fanandevozana; ho an’ireo ankizy tsy mahazo fifaliana noho ny hanoanana, ady, fitiavan-tenan’ny olon-dehibe.
Miandrandra tontolo anjakan’ny Fiadanana sy Fandriampahalemana ny rehetra. Tontolo lavitry ny ady sy ny herisetra amam-basy. Ahoana anefa no hahatongavana amin’izany raha tsy ny fitaovam-piadiana izay fototry ny herisetra aloha no ezahina ho foanana.
Manasa sy mitaona ny kristianina tsy ankanavaka àry ny Papa hiombom-bavaka aminy amin’ny Fanolorana iainana isan’andro, mba handraisan’ireo mpitondra fanjakana fepetra amin’ny fampitsaharana ny fivarotana sy fampiasana fitaovam-piadiana. Ny filoham-panjakana irery ihany manko no manana ny fahefana feno afaka hanafoana ny famarotana sy fividianana fitaovam-piadiana eo amin’ny firenena iadidiany. Na dia i Jesoa tao an-tanimbolin’i Oliva aza nandrara ny mpianatra tsy hamely amin’ny sabatra, raha iny tonga hisambotra azy iny ny fahavalo. « Ampidiro amin’ny tranony ny sabatrao, hoy Jesoa, fa izay hamely amin’ny sabatra dia hofatin’ny sabatra » (Mt 26, 52). « Hovana ny sabatra ho fangady, ny lefona ho antsy fijinjana. Ny firenena tsy hisy hanangan-tsabatra hamely ny firenena hafa ary tsy hianatra ady intsony ny olona » (Izaia 2, 4).
