Fangatahana ampanaovin’ny Papa Ray Masina – Janoary 2021
Mba homen’ny Tompo ny fahasoavana hiaina am-pirahalahiana tanteraka miaraka amin’ireo rahalahintsika sy anabavintsika hafa finoana isika, hifampitondra am-bavaka sy hisokatra amin’ny rehetra.
Ny fangatahana amin’ity volana Janoary ity dia anentanan’ny Papa Ray Masina antsika, hivavaka manokana ho an’ny firahalahiana amam-pifankatiavana eo amin’ny samy zanak’olombelona. Amin’izany indrindra no amporisihany antsika mba hahalala sy ho tia ny hafa, indrindra ireo havantsika, rahalahy sy anabavy avy amin’ny finoana na fivavahana hafa. Ato anatin’izao volana janoary izao rahateo mantsy no ivavahana ho an’ny firaisam-pinoana sy ny fandriampahalemana eran-tany.
Asongadin’ny Papa Fransoa amin’izany àry ny Ansiklika farany nosoratany mitondra ny lohateny hoe « Fratelli tutti » « Mpirahalahy ny rehetra » sy ny fanambarana momba ny firahalahian’ny olombelona ho an’ny fandriampahalemana maneran-tany sy ny fiaraha-miaina, izay nosoniavin'i Papa Fransoa sy ny Grand Imam d’al-Azhar, tamin’ny 4 Febroary 2019.
Amin’izao fiandohan’ny taona izao dia manentana antsika tokoa ny Papa hivavaka sy hitalaho amin’i Jesoa, manoloana ireo fanamby maneran-tany ankehitriny, mba hiray hina ao anatin’ny firahalahiana ny zanak’olombelona tsy misy avakavaka, araka ny fomba amana kolontsaina sy fivavahany avy.
Amin’izao hafatra miantefa amintsika izao, noho ity Tambajotram-pivavahana ity, ny Papa Fransoa dia mahita ao anatin’ny vavaka, kofehy iray izay mampiray ny mpino. Ho azy ny tsy fitoviana eo amin’ny olona samihafa fivavahana na miaina araka ny fomba amam-panaony avy, dia tsy tokony ho sakana na oviana na oviana ho amin’ny fanatrarana ny kolontsain’ny fiombonana, satria samy mpirahalahy mpivavaka rahateo isika.
Hoy ny Papa Fransoa hoe : « Ny Firahalahiana dia mitarika antsika hisokatra amin’ilay Ray iombonana ary hahita ao amin’ny hafa toy ny mpiray tampo mifampizara ny fiainana, mifanohana, mifankatia, mifankahalala ».
Ary raha mahatsiaro ny Papa fa « ny Eglizy dia manome lanja ny asan’Andriamanitra amin’ny fivavahana hafa », dia tsy tokony hohadinointsika, hoy izy, fa ho an’ny Kristiana, « ny loharanon’ny fahamendrehana sy ny firahalahiana dia tsy aiza tsy akory fa ao amin’ny Evanjelin’i Jesoa Kristy ».
Eo am-pikarohana ny tena firahalahiana marina, ny Papa Fransoa dia manasa ny mpino hiverina amin’ny votoatin’ny finoana izay fehezin’ny « fitsaohana an’Andriamanitra » sy ny « fitiavana ny namana ».
Toa mbola manamafy sy manentana ny mpino hatrany ny Papa hivavaka, « mba hanomezan'ny Tompo fahasoavana hiaina anaty firahalahiana tanteraka, amin'ireo tapaka sy namana hafa finoana na fivavahana hafa, amin'ny alalan’ny fampitsaharana ny fifanoherana na tsy fifankahazoana, ka hifampitondra am-bavaka ny tsirairay »
Taorian’iny taona 2020 iny, izay nanamarika manokana ny fisian’ny valan’aretina covid19 sy ny fiatraikany teo amin’ny lafiny ara-tsosialy sy toekarena, ity fangatahan’ny Papa ity, hoy Mompera Frédéric FORNOS, Tale Iraisam-pirenena’ny Tambajotram-pivavahan’ny Papa maneran-tany, dia manampy antsika hahatsapa tena ho toy ny mpirahalahy mankamin’ny fandriampahalemana, izay nanjary nilaina bebe kokoa ». Nomarihiny manokana ny Toko faha 8 ao amin’ny Ansiklika « Fratelli tutti – Mpirahalahy ny rehetra », ka nanasongadinany ny maha zava-dehibe ny fivavahana « ho fanorenana firahalahiana sy fiarovana ny fahamarinana eo anivon’ny fiaraha-monina ».
Narisoa sj
