100 taona ny Fivondronana eokaristikan’ny tanora

Loharano : Lakroan’i Madagasikara, 17 jolay 2014

Mankalaza ny faha 100 taona niorenany ankehitriny ny FET na ny Fivondronana Eokaristikan’ny Tanora maneran-tany (1915 – 2015). Mandray anjara amin’izany i Madagasikara.

Tany amin’ny diosezin’i Toamasina no nanokafana ny fankalazana ny faha 100 taonan’ny FET tamin’ny fomba ofisialy, ny alahady 22 jiona 2014, andro fankalazana ny Sakiramenta masina. Io andro io rahateo, isan-taona, no andron’ny AFAFI (Aina sy Famonjena ny Fivavahana)-FET maneran-tany. Izay no antony nifidianan’ny Foibe any Roma azy hanokafana izao taon-jobily lehibe izao.

Fankalazana roa lehibe ihany koa no mifanindran-dalana amin’izao faha 100 taonan’ny FET izao, dia ny faha 170 taona niorenan’ny AFAFI maneran-tany sy ny faha 95 taona niorenan’ny FET teto Madagasikara. Ny teny Faneva manentana iombonana maneran-tany ho an’ izao taom-pankalazana izao dia ny tenin’i Jesoa tamin’ny mpianany manao hoe : « Mba ho ao aminareo ny fifaliako » (Joany 15, 11).

Vavaka sy famelabelarana fiomanam-panahy

Ny zoma 20 Jiona tolakandro no fahatongavan’ny mpizaika tao Toamasina, maherin’ny 500 avy amin’ny diosezy 17 nahatonga solontena, miampy ireo EKA mpianatra amin’ny Oniversite.

Ny sabotsy maraina, tao amin’ny Paroasy Notre Dame, natomboka tamin’ny Sorona masina ny fotoana. Notarihin’ny aomonie nasionaly P. Odon Andrianarisoa sj sy ny aomonien’ny diosezin’i Toamasina P. Jean Aimé Rakotoarimisy notronin’ireo aomonie avy amin’ny diosezy isan-tokony. Taorian’izay, dia nitondra ny famelabelarana sy ny fampahafantarana ny « Tantaran’ny AFAFI sy ny FET maneran-tany ary koa ny eto Madagasikara » ny aomonie nasionaly.

« Ny FET sy ny Eokaristia » kosa no novelabelarin’i P. Jean Aimé Rakotoarimisy ny tolakandro. Ny Eokaristia rahateo no fototra mampivondrona sy mampiray ny mpikambana rehetra ka dia nomena lanja sy toerana manokana izany tamin’ny fanokafana. Ny harivan’io andro io ihany dia fitsaohana masina nandraisana ny tsodranon’ny Sakiramenta masina no nifantohan’ny rehetra, tao an-tokotanin’ny kolejy Stella Maris. Vavaka narahin-kira, fihainoana ny tenin’Andriamanitra sy fotoam-pahanginana nibanjinana ny Vatana aman-dRan’i Jesoa no nameno sy nanenika ny fon’ny mpizaika. Hita taratra tokoa ny fankamamian’ny FET sy ny fanajany ary ny firaiketam-pony amin’ny fon’i Jesoa be fitiavana. Fivavahana – Tenin’Andriamanitra – Eokaristia, izany no aina mamelona sy sakafo mamonto ny fiainan’ny FET ka mahatonga azy hihaJesoa isan’andro, araka ny tarigetram-piainany. Nofaranana tamin’ny sahoby nanehoana ny fiainana maha AFAFI-FET io sabotsy io.

Jereo eo amin’ny tranokalan’ny Lakroan’i Madagasikara ny tohiny.